Өнгөрөгч 3-р сард бид “Онцлох бизнес” буландаа LHAMOUR брэндийг онцолсон билээ. Тэгвэл өнөөдөр бид олон улсад нэр хүндтэй, органик бүтээгдэхүүний брэнд болох зорилготой Lhamour-ийг үүсгэн байгуулагч Д.Хуланг илүү хувь хүн талаас нь мэдэж авахаар “Би хэрхэн ажилладаг вэ?” буландаа урилаа. Англи, Германд боловсрол эзэмшин Ньюком группт сэргээгдэх эрчим хүчний чиглэлээр ажиллаж байсан тэрээр органик бүтээгдэхүүний салбарыг сонирхон судалж, үйлдвэрлэлээ анх гэрээсээ эхлүүлж байсан бөгөөд ердөө хоёр жил хагасын хугацаанд бизнесээ 30 гаруй хүнтэй, нэрийн хоёр дэлгүүртэй болтол нь өргөжүүлж чадсан юм. Энэ амжилтыг нь үнэлэн NHК WORLD телевиз түүнийг "Азийн сарын онцлох эмэгтэй"-гээр тодруулж, энэ сарын сүүлээр Lhamour-ийн талаар баримтат нэвтрүүлэг хийх болжээ. Мөн зочин маань ирэх 11-р сарын 17-нд Сингапурт "Шилдэг хариуцлагатай жижиг дунд үйлдвэр" шагналыг хүлээн авч, 11-р сарын 23-нд "Ази, Номхон Далайн шилдэг залуу энтрепренер"-ийг шалгаруулах ёслолд топ 5 нэр дэвшигчийн нэгийн хувиар оролцоно гэдгийг уншигчдадаа дуулгахад таатай байна.

Байршил: Монгол, Улаанбаатар
Одоо хашиж буй ажил, албан тушаал: Natural Essentials ХХК-ийн захирал, Lhamour брэндийг үүсгэн байгуулагч
Хэрэглэдэг гар утас: iPhone 6
Хэрэглэдэг компьютер: Macbook Pro 13’
Таны ажиллах арга барилыг цөөн үгээр тодорхойлбол: Шинийг эрэлхийлэгч, сэтгэлээсээ
Сошиал хуудсууд: @hulancka (твиттер), @hulancka (инстаграм)

ТАНЫ АЖЛЫН ОНЦЛОХ АРГА БАРИЛ?

Бүтээлч сэтгэлгээтэй, баригдмал бус чөлөөтэй байх нь миний уг чанар юм шиг санагддаг. Нөгөө талаас би сайн төлөвлөдөг. Төлөвлөсөн зүйлээс төсөөлж харж чаддаг. Төлөвлөсөн бол биелүүлэх гэж зүтгэнэ. Ер нь нэг юм барьж авбал гүнзгий ороод явчихдаг. Тэгэхээр бүтээлч байдал, төлөвлөгөө гэсэн хоёр зүйлийг хослуулах дуртай юм болов уу.

Үр бүтээмжтэй байх үе гэвэл, өдрийн турш уулзалт, менежментийн ажил гэж явсаар ажил тарснаас хойш шөнө хүртэл ганцаараа суухдаа төлөвлөх, бичих ажлаа амжуулдаг.

ТА ХАМГИЙН ИХ АШИГЛАДАГ, АШИГЛАХ ДУРТАЙ АЖЛЫН ХЭРЭГСЭЛ, ПРОГРАМ, АППЛИКЭЙШНүүдээсээНЭРЛЭНЭ ҮҮ?

Хамгийн их хэрэглэдэг зүйл бол имэйл. Хувийн, компанийн гээд нэлээд олон имэйл ашигладаг. Өглөө имэйлээ шалгаж ажлын өдрөө эхлүүлнэ. Teamup гэдэг олон хүний хамтран хэрэглэж болдог календарийг сүүлийн үед идэвхтэй ашигладаг болоод байгаа. Уулзалт болон цаг нартай ажлууд олон байдаг болохоор олуулаа ажлуудаа харж байхад зүгээр юм билээ.

Сошиал медиа гэвэл хувийнхаа фэйсбүүкийг аль болох хэрэглэхгүй байхыг хичээж байгаа. Гэхдээ компанийнхаа хуудсыг өөрөө байнга хөтөлдөг. Твиттер, Инстаграмыг илүү их хэрэглэж, хувийнхаа хуудсуудаас компанийнхаа мэдээллийг өгөхийг эрмэлздэг. Мөн хөгжим их сонсдог болохоор iМusic-ийг ашиглах дуртай. VSCO гэх мэт зураг янзалдаг аппууд бас бий.

ТА АЖЛЫН ӨРӨӨ, АЖЛЫН ОРЧНОО ДҮРСЭЛНЭ ҮҮ?

ЦАГ ХЭМНЭХ ХАМГИЙН САЙН АРГА ТАНЬ ЮУ ВЭ?

Тухайн өдөр, тухайн долоо хоног, тухайн сард хийх хамгийн чухал ажлуудаа ялгаж, тэдгээрийгээ л хийх гэж тэмүүлэх нь цаг хэмнэдэг. Маш их ажилтай, тэр ажлуудаа зэрэг зэрэг хийх боломжгүй болохоор ингэхээс ч өөр аргагүй. Миний хувьд чухал гэсэн ажлуудаа бол хойш тавьдаггүй.

ТА ХИЙХ АЖЛЫН ЖАГСААЛТАА ЮУН ДЭЭР, ЯАЖ ХӨТӨЛДӨГ ВЭ?

Тэмдэглэлийн дэвтэр ашиглана. Гэхдээ үүнээс илүүтэйгээр А5-ын цаасан дээр чухал ажлуудаа бичиж ширээн дээрээ тавьдаг. Дэвтэр дээр бичихээс харахад илүү хялбар байдаг. Би ер нь юмыг харж төсөөлж хийх дуртай хүн.

ТА ЯМАР ЗҮЙЛСИЙГ ХИЙХДЭЭ ГАРГУУД ВЭ?

Lhamour-ийг үүсгэн байгуулсан шалтгаан бол миний шинийг эрэлхийлж явдаг зан чанартай холбоотой. Би энэ зүйлийг яагаад өөрөөр хийж болохгүй билээ гэж үргэлж боддог. Шинэ орц найрлага үүсгэнэ, бүтээгдэхүүнийхээ сав боодлыг шинээр сэтгэнэ. Анх бүтээгдэхүүн гаргаагүй байхдаа хүртэл зарим савлагааг нь өөрөө хийж байлаа. Ер нь бүтээгдэхүүнийхээ дизайнуудыг дандаа өөрөө гаргадаг.

Нөгөө талаар би алсыг харахыг эрмэлздэг юм шиг байгаа юм. Хийж байгаа ажлаа 50, 100 жилийн дараах байдлаар төсөөлөөд байдаг. Тэр төсөөлсөн зүйлээ бодит болгохын төлөө зүтгэдэг.

Сүүлийн үед бас залуучуудад лекц, яриа нэлээд хийх болсон шүү. Өнгөрсөн 7 хоногт л гэхэд СЭЗДС-ийн оюутнуудад лекц уншсан. Сурсан, давж гарсан зүйлсээ өөртөө хадгалаад байлгүй бусадтай хуваалцаж, багахан ч гэсэн урам зориг өгөхийг хүсэж байна.

ТАНЫ ХИЙЖ БАЙГАА АЖЛЫН ОНЦЛОГ НЬ ЮУ ВЭ? ЭЕРЭГ САЙН БА ХЭЦҮҮ БЭРХШЭЭЛТЭЙ ТАЛУУД?

Манай компани монгол түүхий эдийг гадаадын түүхий эдтэй хослуулан шинэлэг, өвөрмөц байдлаар олон улсын стандартад нийцсэн органик бүтээгдэхүүн үйлдвэрлэдэг. Органик бүтээгдэхүүн гаргадаг учраас бүх л үйлдвэрлэлээ байгаль орчинд ээлтэй байлгахыг зорьж, 100 хувь хаягдалгүй үйл ажиллагаа явуулдаг. Эрүүл, байгаль орчинд ээлтэй зүйлсийг бүтээх нь, органик материалуудыг үйлдвэрлэлдээ ашиглах нь манай зорилго.

Өөрийн сурсан мэдсэн зүйлээ ашиглан төсөөллөө бодит болгон хүмүүсийн хэрэглээнд нэвтрүүлж, тэр нь эерэг нөлөө үзүүлэхийг харах үнэхээр урамтай сайхан байдаг. Дотооддоо нэмүү өртөг шингээсэн бүтээгдэхүүн үйлдвэрлээд, улсынхаа эдийн засагт бага ч гэсэн хувь нэмэр оруулж байгаадаа баярладаг юм.

Нөгөө талаас асуудал бэрхшээлтэй бол өдөр болгон тулна. Монгол шиг үйлдвэрлэл сайн хөгжөөгүй газар ийм шинэлэг, үнэтэй түүхий эд ордог, массын хэрэглээний биш бүтээгдэхүүнүүдийг үйлдвэрлэн гаргахад хүмүүсийн мэдээлэл дутуугаас эхлээд хууль эрх зүй, татварын орчин гээд асар олон хүндрэл бий. Гадаадад ч гэсэн монгол бүтээгдэхүүн чанартай гэх ойлголтыг төрүүлэх амаргүй, цаг авсан ажил юм байна гэдгийг олж мэдсэн. Тиймдээ ч бид эхний жилдээ борлуулалт гэхээсээ илүү хэрэглэгчдэд органик бүтээгдэхүүнийг таниулах, үйл ажиллагаагаа сурталчлах, бүтээгдэхүүнээ илүү чанаржуулах ажлыг нэгдүгээрт тавьж байсан. Сүүлийн үед эрүүл мэнддээ анхаарч, органик бүтээгдэхүүн хэрэглэхийг хүсдэг хүмүүс нэлээд олширч байгаа шүү.

ТА ЯГ ОДОО ЮУН ДЭЭР ТӨВЛӨРӨН АЖИЛЛАЖ БАЙНА ВЭ?

Хоёр зүйл дээр голлон анхаарч байна. Нэгдүгээрт, компанийнхаа менежментийг сайжруулж, компанийн соёлыг бий болгох. Сар болгон бид дотроо кампанит ажил зохион байгуулдаг. Энэ 10-р сарыг “Компанийн соёл” сэдэвт сар болгочихоод, компанийн соёлтой холбоотой бүх зүйлсийг боловсруулж, цэгцэлж байна. Танайд 3-р сард ярилцлага өгөх үед манайх 13 хүнтэй байсан бол одоо 32 ажилтантай болсон байна. Компани жижиг байхад удирдагч, энтрепренер нь компанийн “хөдөлгүүр” байдаг бол олон хүнтэй болж томрох тусам компани нэг хүнээс хамааралгүй болж, хэн ч удирдаж байсан, цаашаа хөгжих ёстой. Үүнд компанийн соёл, менежмент нэн чухал.

Хоёрдугаарт, манайх шинэ бүтээгдэхүүнийг байнга л эрэлхийлж байдаг. Яг одоо бол эрчүүдэд зориулан сахлаа авсны дараа түрхдэг тос гаргахаар ажиллаж байна. Мөн олон улсад бүтээгдэхүүнээ экспортлох зорилготой учир олон улсын стандарт, гэрчилгээ авах ажлыг судлаад нэлээд нааштай явж байгаа.

ТА АЖИЛЛАЖ БАЙХДАА ХӨГЖИМ СОНСДОГ УУ? ЯМАР ТӨРЛИЙН ХӨГЖИМ ТАНЫГ ЭРЧ ХҮЧТЭЙ БОЛГОДОГ ВЭ?

Хөгжимд маш их дуртай. Хөгжмийн нарийн боловсрол байхгүй ч хөгжим зохиохыг хүсдэг шүү. Ер нь л юм бүтээх, байхгүй зүйлийг бий болгох дуртай хүн юм шиг байгаа юм. Илүү сонсдог жанр гэвэл хип хоп. Тэр дундаа old school буюу андерграунд хип хоп. 2pac, Wu Tang нарын бүтээлүүдэд дуртай. The Weeknd–ийг алдартай болохоос нь өмнө их сонсдог байлаа. Би ялангуяа дууны үгийг их анхаарч сонсдог.

ТА ЯГ ОДОО ЯМАР НОМ/НИЙТЛЭЛ УНШИЖ БАЙНА ВЭ?

Бизнесийн талаар байнга ярилцдаг найзынхаа санал болгосон Crossing The Chasm номыг уншиж байна. Гарааны бизнесүүдэд зориулсан ном юм. Мөн entrepreneur.com-оос бизнесийн нийтлэлүүд уншдаг. Аль болох бусдаас сайн суралцаж, алдаа гаргахаас сэргийлэхийг хичээдэг юм. Ер нь өдөртөө ямар ч байсан энэ төрлийн нийтлэлүүд уншчихаад байдаг шүү.

ТА ИЛҮҮ НЭЭЛТТЭЙ ХҮН ҮҮ, АЛЬ ЭСВЭЛ ИЛҮҮ ДОТОГШОО ХҮН ҮҮ? ЭНЭ НЬ ТАНЫ АЖИЛД ЯАЖ НӨЛӨӨЛДӨГ ВЭ?

Аль аль нь гэж хэлж болох байх. Нээлттэй хүн учраас энэ бизнесийг эхлүүлсэн болов уу. Би ажилдаа хайртай учраас бусдад таниулж тайлбарлаж, аль болох олон хүнд хүргэхийг хүсдэг. Гэхдээ ажил дуусаж “хөшиг хаагдсаны” дараа нэлээн дотогшоо хүн. Хувийн амьдралаа би хүнд нэг их дэлгээд байдаггүй. 15 наснаасаа хойш ганцаараа амьдарсан болохоор ганцаараа байгаад сурчихсан. Ганцаараа байхад илүү бүтээлч, өөрийнхөөрөө байж чаддаг.

ТА ХЭДЭЭС ХЭДЭН ЦАГИЙН ХООРОНД УНТДАГ ВЭ?

Эртдээ шөнийн 01 цаг гэж унтана. Унтахын өмнө их юм боддог учраас амархан унтаж чаддаггүй. Өглөө 8-8.30-ын хооронд босдог.

ТАНЫГ АЖИЛЛААГҮЙ ҮЕД ТАНЬ ХААНААС ОЛЖ БОЛОХ ВЭ?

Гэртээ юм уу нийгэмд чиглэсэн арга хэмжээнүүд дээрээс олж болно. Сүүлийн үед фитнесст явах гэж хичээж байна. Хагас, бүтэн сайнд боломжтой бол хотоос гарч цэвэр агаарт гарахыг эрмэлздэг. Цэвэр агаар сайхан амралт болдог юм.

Фитнесс гэснээс ер нь би гүйж харайх дуртай нэлээд эрэгтэйлэг хүүхэд байсан. Хип хоп сонсоно, машин сонирхоно, хөвгүүдтэй найзлана гээд л. Нүүрээ ч гэсэн бараг буддаггүй байлаа. Намайг гоо сайхандаа гойд анхаардаг учраас гоо сайхны бүтээгдэхүүний брэнд үүсгэсэн гэж зарим хүмүүс боддог юм билээ. Гэвч манай бүтээгдэхүүнүүд гоо сайхны гэхээсээ эрүүлжүүлэх зорилготой гэдгийг нь онцлон дурдмаар байна.

ТА ХЭНЭЭС, ЮУНААС УРАМ ЗОРИГ, ЭРЧ ХҮЧ АВДАГ ВЭ?

Өмнөө тавьсан зорилгоосоо эрч хүч авна даа. Хэтийн зорилгодоо хүрэхийн төлөө бүхнээ зориулдаг. Зорилго маань хол байгаа болохоор нэг бодлын зүгээр байдаг юм. Бэрхшээлийг бэрхшээл гэж харахаа больчихдог юм шиг. Бүх л алдаа, бэрхшээл сургамж мэт. Би өнөөг хүртэл анх тавьсан зорилгоосоо хазайгаагүй явж байна.

Мөн гэр бүлийнхнээсээ урам зориг авдаг. Тэд маань надад байнга урмын үг хайрладаг болохоор би хүссэн зүйлээ хийж, өөрийнхөөрөө байж чаддаг.

ТАНЫ АМЬДРАЛДАА АВЧ БАЙСАН ХАМГИЙН САЙН ЗӨВЛӨГӨӨ ЮУ ВЭ?

Ганц л амьдрах юм чинь хүссэн мөрөөдсөн зүйлийнхээ төлөө явах нь чухал гэдгийг ойлгосон маань юм болов уу. Энийг хүмүүс байнга боддог ч, байнга сонсдог ч, хүн бүр хэрэгжүүлдэг билүү?

Аав ээж маань ах бид хоёрт бага байхаас л сонголтууд өгч, хүссэн зүйлээ хийх боломжийг олгодог байсан. Ээж маань өөрийгөө дайчилж боловсрол эзэмшсэн хүн болохоор өндөр боловсролтой бол гэдэг байсан. Мөн эрэгтэй, эмэгтэй хүмүүс чадварын хувьд адилхан гэдгийг надад сануулдаг байлаа.

Бас манайх тогтмол нүүдэг байсан нь надад хувь хүнийхээ хувьд хөгжиж, тэмцэгч чанартай болгосон гэж боддог. Яагаад гэхээр нүүж очсон газартаа дандаа шинэ хүн нь болж, хүлээн зөвшөөрөгдөхийн тулд өөрийгөө харуулах ёстой болно шүү дээ.

ЗАЛУУ МЭРГЭЖИЛТНҮҮДЭД ХАНДАН ХАМГИЙН ЧУХАЛ НЭГ ЗӨВЛӨГӨӨ ӨГӨӨЧ ГЭВЭЛ ЮУ ГЭХ ВЭ?

Хүсэж мөрөөдөж буй зүйлдээ бат итгэж байвал тэрнийхээ төлөө сэтгэл зүрхээ зориул. Зорилгодоо хүрэхгүй байсан ч сургамж болно. Хожим амьдралаа эргэж хараад харамсахгүйн тулд хийгээд л үзэх хэрэгтэй гэж хэлье.

Энэ явцад санаж явах ёстой зүйл бол том зорилгод жижиг жижиг алхмаар хүрдэг. Үйлдвэрлэл явуулах амаргүй гэдгийг бүгд л мэднэ. Зарим нь заавал том үйлдвэр барих ёстой гэж өрөөсгөл боддог. Гэтэл би жишээ нь үйлдвэрлэлээ гэрийнхээ гал тогооноос л эхэлсэн. Тэгээд алхам алхмаар урагшилж чадсан. Энэ хооронд их ч золиос гаргах шаардлагатай байдаг юм билээ. Өнгөрсөн 2 жил найзууд маань хамтдаа цагийг өнгөрүүлж хөгжилтэй байхад очиж чадахгүй байх нь залуу хүний хувьд хэцүү байдаг байлаа. Гэвч түр зуурын юм гэдэг бол түр л зуурынх. Хэчнээн золиос гаргасан ч хонгилын үзүүрт гэрэл асна гэдгийг санаж, цөхрөлтгүй л зүтгэх хэрэгтэй. Миний хувьд хоёр жил хагасын өмнө бүтээгдэхүүн маань Азид ийм хурдан хүлээн зөвшөөрөгдөж эхэлнэ гэдгийг огтхон ч төсөөлж байсангүй.

ТА ЭНЭ БУЛАНД ХЭНИЙГ САНАЛ БОЛГОЖ, АЖЛЫН АРГА БАРИЛТАЙ НЬ ТАНИЛЦМААР БАЙНА ВЭ?

Эдийн засагч Ч.Хашчулуун гуайг санал болгоё. Би энд тэнд явахтай нь нэлээд тааралддаг юм. Байнга л яаруу яваа харагддаг. Эдийн засгийг нь томоор хардаг хүний өдөр тутмын ажлын арга барилыг сонирхвол сонирхолтой байна байх.

Гэрэл зургийг Б.Батзаяа

Lifehacker сайтаас санаа аван эхлүүлсэн “Би хэрхэн ажилладаг вэ?” булангаараа бид лхагва гараг бүр амжилттай яваа, бүтээлч хүмүүсийн ажиллах арга барил, дадал хэвшлийг танилцуулдаг. Та хэн хэний ажлын арга барилтай танилцмаар байгаагаа editor@unread.today рүү бичээрэй.