Мэдүүштэй

Таны өнөөдрөөс эхлэн сонсвол зохих 6 подкаст

12 сарын 08, 2016


НИЙТЭЛСЭН:

Undral Amarsaikhan
@Undral


32662   10




Замын түгжрээнд хамаг цагаа барж, "хоцордог" хүмүүсийг хүлээн дэмий суух хэрэг бишгүй гарах болсон өнөө үед цагаа үр бүтээлтэй өнгөрүүлэх нэг аргыг бид танд санал болгож байна. Энэ бол подкаст. Тогтсон форматтай, хугацаатай, мөн зорилготой эдгээр аудио бичлэгүүдийг утсандаа татаж авснаар та төрөл бүрийн сэдвүүдээр мэдлэгээ нэмэх, мэдээлэл хүлээн авах боломжтой юм. Бид танд яг одоо сонсож эхлэх хамгийн сонирхолтой гэсэн подкастуудыг хуваалцаж байна. 

Planet Money

National Public Radio-ийн эрхлэн гаргадаг хамгийн алдартай подкастуудын нэг Planet Money-ийн эхний дугаар 2008 оны дэлхийн эдийн засгийн хямралын үеэр, энэ хямралын эхлэл, өрнөл, үр нөлөөний талаар энгийн иргэдэд тайлбарлах зорилготойгоор гарч байсан гэдэг. Тэгвэл өнөөдөр ч долоо хоногт 2 удаа гардаг энэ подкаст ердөө 15 минутын дотор эдийн засгийн хамгийн хэцүү ойлголтыг маш ойлгомжтой, энгийнээр бас уйдаахааргүйгээр тайлбарлаж чаддагаараа алдаршин, сонсогчдын хүлээдэг подкаст болж чаджээ. Бүр илүүг сонирхож байвал энэ подкастыг салбарлан гаргасан This American Life-ийг санал болгоё.

ТАТАХ

Илүүг: Planet Money-г их сургуульд макроэкономиксийн хичээлийн үеэр ашиглах нь

Tim Ferriss Show

The New York Times-ийн бестселлерийн жагсаалтанд 4 жилийн турш багтсан, дэлхий даяар 35 хэлэнд орчуулагдан 1 сая гаруй хувь борлогдсон алдарт The 4-Hour Workweek номыг зохиогч Тим Ферриссийн подкастыг заавал сонсоод үзэхийг зөвлөж байна. Т.Феррисс салбар салбарын манлайлагчдыг урин тэдний амжилтын нууцын талаар ярилцлага өрнүүлж, зөвлөгөөг нь уншигчдадаа хүргэдэг. iTunes-ийн 2014, 2015 оны шилдэг подкастын жагсаалтыг тэргүүлсэн энэ ярилцлагуудад А.Шварцнеггер, Э.Нортоноос эхлүүлээд М.Гладвелл, Р.Хоффман, П.Тиел нар хүртэл оролцож байсан юм.

ТАТАХ

Илүүг: Т.Феррис хэрхэн подкастын ертөнцийн Опра болж чадав?

Stuff You Should Know

Өөрийнхөө хэрэглэдэг апп-ийг танилцуулахдаа Skinny-ийн үүсгэн байгуулагч Ө.Үнэнбүрэнгийн санал болгосон Stuff You Should Know-ийг бид танд ч гэсэн сонсохыг зөвлөж байна. Ерөөсөө л бүх л сэдвийн талаар "ерөнхий мэдлэг" өгөх зорилго агуулсан энэ подкастын сүүлийн 8 жилийн турш гаргасан ангиудаас санамсаргүй сонгосон ч та харамсахгүй. "Шарталт гэж юу вэ?", "Спам хэрхэн ажилладаг вэ?", "Нар таныг алж чадах уу?" "Дежа ву хэрхэн үүсдэг вэ?" гэх мэтээр тун сонирхолтой асуултуудын хариуг та эндээс авах боломжтой.

ТАТАХ

TED Radio Hour

Уйтгартай сонголт санагдаж магадгүй. Гэхдээ бидэнд TED-ийн гайхалтай илтгэлүүдийг бүгдийг нь үзэх цаг, боломж, нөхцөл байдаггүй шүү дээ. Яагаад замдаа, хэн нэгнийг хүлээнгээ дараагийн сонирхолтой санаа, сонин шийдлүүд, мэдүүштэй ололтуудын талаар сонсож болохгүй гэж? Ийм боломжийг NPR-ийн долоо хоног бүр эрхлэн гаргадаг TED Radio Hour танд санал болгож байна. TED учир чанарт нь эргэлзэх хэрэггүй, шууд л сонсож эхлэх подкаст.

ТАТАХ


Tell Me Something I Don't Know

Эдийн засгийн онолын түвэгтэй ойлголтуудыг тун сонирхолтой ажиглалтууд, жишээнүүдтэй нийлүүлэн тайлбарладаг Freaknomics-ийн зохиогчдын шинээр гаргаж буй Tell Me Something I Don't Know-ийг танд санал болгоё. Өнгөрсөн 11-р сараас эхэлсэн энэ подкаст тайзан дээр, олны танил алдартнууд бүхий зочид болон үзэгчдийн хамтаар шууд бичигддэгээрээ онцлогтой. Уригдан ирсэн зочид сонсогчдын мэдэхгүй зүйлийн талаар л ярилцах ёстой. Энгийн байгаа биз? Хэрвээ энэ танд хангалтгүй бол Freakonomics-ийн бусад подкастуудыг сонсоод үзээрэй.

ТАТАХ

The Serial

"Би хэрхэн ажилладаг вэ?" булангийн маань эхний зочин Э.Лхагвын санал болгосон энэ цуврал намайг подкастанд эргэж буцалтгүй оруулсан юм. Эрэн сурвалжлах сэтгүүл зүйн томоохон кэйзүүдийн нэг болсон энэ цуврал аль хэдийн мартагдсан хэргүүдийг эргэж сөхөн, бодит баримт дээр тулгуурлан болсон үйл явдлыг нь хүүрнэдэг тун өвөрмөц подкаст. Эхний улирал нь iTunes-д тавигдахаасаа өмнө жагсаалтын №1-д бичигдсэн бөгөөд 1999 онд болсон ахлах ангийн сурагчийн амь насанд хүрсэн хэргийн талаар өгүүлдэг. 80 сая гаруй удаа татагдсан энэ цувралын ачаар олон нийт "тодорхойгүй", "ойлгомжгүй" зүйл ихтэй энэ хэрэгт анхаарал хандуулж, улмаар уг хэргийг дахин сэргээх шийдвэрийг шүүх гаргаад байгаа билээ. Сонсогч таныг яг л мөрдөгч болчихсон юм шиг сэтгэгдлийг төрүүлж, дараагийн ангид яах бол гэх догдлолыг өгөх подкаст.

ТАТАХ

Илүүг: Аднаны хэрэг The Serial-ийн ачаар ахин сөхөгдлөө

Харин та ямар подкастууд сонсдог вэ? Өөрийн дуртай, сонсдог подкастуудаасаа бидэнтэй хуваалцаж, бусад уншигчдадаа санал болгоорой.

Хариу бичих

Та 100-с доошгүй тэмдэгт ашиглан санал сэтгэгдлээ бүтээлчээр үлдээгээрэй. Хамтдаа сэтгэгдэл бичих соёлыг Монголд бий болгоцгооё.