Мэдүүштэй

Монгол ажилтнуудын бүтээмжтэй холбоотой 3 сонирхолтой баримт

10 сарын 20, 2016


НИЙТЭЛСЭН:

Undral Amarsaikhan
@Undral


50792   7




Статистикийн ерөнхий хорооны тайланд дурдсанаар Монгол улс хүний нөөцийн зардалдаа жил бүр 1.4 их наяд төгрөг зарцуулдаг аж. Үүнээсээ 2.9% буюу 40 тэрбум төгрөгийг ажилчдын хөгжүүлэлт, сургалтанд зориулдаг гэнэ. Гэсэн ч 80 орчим хувь нь үр ашиггүй зарцуулагддаг талаар хүний нөөцийн хөгжүүлэлтийн үйлчилгээ үзүүлдэг NPC&Mandal-ийн гаргасан судалгааны тайланд онцолжээ. Тус байгууллагын сүүлийн 3 жилийн хугацаанд 40 гаруй байгууллагын 1000 орчим ажилтан дээр хийсэн судалгааны үр дүнгээс хамгийн сонирхолтой баримтуудыг бид танилцуулж байна. 

1. Хоёр ажилтны нэг нь дарга болохыг зорьдог

Байгууллагын зорилгын төлөө тухайн ажилтны хийх гол зүйл бол шинэ санаа, шинэ бүтээл гаргах явдал гэдэг. Байгууллагадаа өөрийн хувь нэмрийг оруулж, өөрийгөө чадавхжуулах нь ажилтны гол "даалгавар". Гэтэл энэ судалгаанд оролцогсдын ердөө 13 хувь нь л ийм бодлоор өөрийгөө цэнэглэж ажилладаг гэнэ. "Та ирэх 5 жилд байгууллагадаа ямар зүйлсийг хийж бүтээх вэ? Ямар төлөвлөгөөтэй байна вэ?" гэсэн асуултад 2 хүн тутмын нэг нь буюу 49 хувь нь удирдах ажилтан болох, салбартаа манлайлах гэсэн хариултыг өгсөн байна. Зорилготой, амбицтай байх нь зөв л дөө. Гэхдээ үүнээс өмнө өөрийгөө чадавхжуулж бэлдэх нь илүү чухал. Судалгаанд оролцогсдын 13 хувь нь гадаад хэлийг бүрэн эзэмших, 9 хувь нь зэрэг дээшлүүлж, олон улсад суралцаж, туршлага судлах тухай дурджээ. Ингэхэд та өөрөө ч гэсэн арай эрт "дарга" болохыг мөрөөдөөд байгаа юм биш биз?

Эх сурвалж: NPC&Mandal

2. Таван ажилтны нэг нь ажлын стрессээ тайлах гэж архи, тамхи хэрэглэдэг

Тухайн ажилтны бүтээмжтэй холбоотой хамгийн чухал асуултуудын нэг бол стрессээ хэрхэн давах вэ буюу энергиэ хэрхэн хуваарилдаг вэ тухай асуудал юм. Энергийн хуваарилалт байхгүй хамгийн бүтээмжтэй ажилтан ч богино хугацаанд бүтээмжгүй болох эрсдэлтэй. Тэгвэл "Таны стресс ямар байдлаар илэрдэг вэ?" гэсэн асуултад 22 хувь нь архи, тамхины хэрэглээ нэмэгддэг гэж хариулжээ. Энэ бол тийм ч зөв арга биш байх. Үүнээс гадна хамгийн их буюу 31 хувь нь идэвхгүй болж, сөрөг бодлууд төрж эхэлдэг гэжээ. Энэ нь гадагшаа чиглэсэн сөрөг үйлдлүүд хийх буюу бусдад уурлаж, бусдыг буруутгадаг гэж хариулсан 17 хувиас арай дээр мэт. Гэтэл ийм үед хэрэглэх ёстой хамгийн зөв арга буюу бусадтай ярилцах, гарц хайх гэх хариултыг ердөө 12 хувь нь сонгожээ. Стресст өртсөн үедээ ажилтнууд стрессээс гарах зөв арга замыг илэрхийлдэггүй ба үүнээс үүдэн энергийн алдагдалд ордог байна. Танай байгууллагад ч гэсэн иймэрхүү хандлага гаргаж, бүтээмжгүй ажиллаж буй ажилтнууд байгаа юм биш биз?

Эх сурвалж: NPC&Mandal

3. Ажилдаа хариуцлагагүй, хайнга ханддаг нь багийг бутаргадаг

Аливаа ажлыг багаар гүйцэтгэж, багаар амжилтанд хүрдэг. Гэвч баг бүрдүүлэн ажиллах үед тулгардаг хамгийн том бэрхшээл нь багийн бутрал юм. Бутрах эрсдэлийг нэмэгдүүлдэг үзүүлэлт нь багийн үр бүтээлгүй ажилтнуудын тоотой шууд хамааралтай байдаг. "Хамгийн муу багийн гишүүдийн тодорхойлолт" гэсэн асуултанд нийт оролцогсдын 55 хувь нь "ажилдаа хайнга, хариуцлагагүй ханддаг" хэмээн хариулжээ. Ердөө зургаахан хувь нь ур чадвар муутай гэж хариулснаас үзэхэд, ур чадвараас илүүтэй олны өмнө үүрэг хариуцлагаа ухамсарласан ажилтан багт илүү хэрэгтэй байдаг гэсэн дүгнэлтийг хийж болохоор байна. Нийт ажилтнуудын 54 хувь нь багийнхаа уур амьсгалд сэтгэл дундуур байдаг гэсэн үр дүнг ч үүнтэй уялдуулан ойлгож болох. Та арай багийнхаа бүтээмжийг унагадаг, "муу" гишүүн нь болчихсон байгаа юм биш биз?

Эх сурвалж: NPC&Mandal

ЭнПиСи энд Мандал нь монгол ажилтны бүтээмжийн судалгааны дүгнэлтэнд үндэслэн “Байгууллагын сэтгэл зүйн удирдлага” технологийг хөгжүүлж байгаа ба одоогоор 1000 орчим ажилтан, удирдах ажилтнуудад хөгжүүлэлтийн хөтөлбөрийг амжилттай хүргэсэн байна. Судалгааны дэлгэрэнгүйг“Байгууллагын Сэтгэл Зүйн Удирдлага 2016” форумаар 2016 оны 10 сарын 22-нд танилцуулах ажээ.

Хариу бичих

Та 100-с доошгүй тэмдэгт ашиглан санал сэтгэгдлээ бүтээлчээр үлдээгээрэй. Хамтдаа сэтгэгдэл бичих соёлыг Монголд бий болгоцгооё.