Энэ долоо хоногийн дундуур Монгол бахархлын өдөр буюу Их эзэн Чингис хааны мэндэлсний 853 жилийн ой, өвлийн тэргүүн сарын шинийн нэгний баярт өдөр тохиолоо. Энэ өдөр Монгол улсын ерөнхийлөгч Ц.Элбэгдорж төрийн тэргүүн зэргийн шагнал "Чингис хаан" одонг Соёлын Гавьяат Зүтгэлтэн, яруу найрагч, зохиолч, соён гэгээрүүлэгч Гомбожавын Мэнд-Ооёод гардуулан өгсөн юм. Бүх нийтийн амралтын өдөр болгон тэмдэглэдэг энэ өдөр уг шагналыг олгох ёслолын ажиллагаанаас гадна есөн хөлт цагаан туганд хүндэтгэл үзүүлэн, цэнгүүлэх арга хэмжээ мөн явагджээ.

Ikon: Фото: Чингис хаан одон гардуулах ёслол
UBS: Г.Мэнд-Ооёо: Сайн үг бол эвийн алтан гагнаас, саар үг бол эвдрэлийн тэсрэх бөмбөг юм

Францын нийслэл Парис хотноо цуврал алан хядах ажиллагаа явагдаж, дэлхий нийтийг цочроолоо. "Хар" баасан гарагт орон нутгийн цагаар 21:00 цагийн орчимд эхэлсэн энэхүү ажиллагаа нь томоохон театр, цэнгэлдэх хүрээлэн, ресторан зэрэг олон хүн цугласан газруудад явагдсан бөгөөд үр дүнд нь 129 хүн амь насаа алдаж, 300 гаруй хүн хүнд байдалтай эмчлэгдэж байна. Исламын Улс бүлэглэл энэхүү хэргийг үйлдсэн хариуцлагыг хүлээхээ мэдэгдэж, Францын ерөнхийлөгч Ф.Олланд 3 хоногийн гашуудлыг улс орондоо зарлаж, үүнтэй зэрэгцэн хилээ хаан, онц байдал зарласан юм. Алан хядагчид биедээ тэсрэх бөмбөг зүүн Герман-Францын шигшээ багуудын хөлбөмбөгийн тоглолт явагдаж байсан Стаде Франц цэнгэлдэх рүү нэвтрэхийг оролдож, ойр орчимд нь дэлбэлсэн нь телевизийн шууд бичлэгт тод сонсогдон үлдсэн байв. 10, 11-р дүүрэгт явагдсан энэхүү харамсалт үйл явдлын дараагаар дэлхий даяар Франц улстай сэтгэл зүрхээрээ хамт байгаагаа илэрхийлж, тэднийг дэмжсэн хөдөлгөөнүүд явагдсаар байна. Өдгөө уг алан хядагчдын нэрийг тодруулах, хамсаатнуудыг нь илрүүлэх ажиллагаа эрчимтэй явагдаж байгаа бөгөөд Бельги болон Франц улсын цагдаа нар хэд хэдэн хүнийг баривчлаад байгаа ажээ.

BBC: Парист юу болж өнгөрөв?
СNN: Хэвлэлүүдийн нүүр хуудаснаа Парисын хэргийг юу гэж бичив?

Олон Улсын Допингийн Эсрэг Төвөөс гаргасан мэдэгдэл спортын ертөнцийг донсолголоо. Тэдний нэлээд удаан хугацаанд явуулсан шинжилгээний үр дүнгээр ОХУ-ын хөнгөн атлетикчид тогтмол допинг хэрэглэж, түүнийг нь холбоо болон улс нь санхүүгээр дэмжиж, нууцлах арга хэмжээг системтэйгээр авдаг байсан нь илэрсэн байна. Үүний дараагаар дэлхийн хамгийн том спорт холбоодын нэг Олон Улсын Хөнгөн Атлетикийн Холбоо ОХУ-ыг гишүүнээсээ хасаж, тэмцээн уралдаанууд, үүний дотор Рио 2016 Олимпийн наадамд оролцох эрхийг нь тодорхойгүй хугацаагаар хасаад байна. Лондон 2012-оос эхлэлтэй гэгдэж буй энэ асуудлыг ОУОХ-ноос маш анхааралтай ажиглан, ОХУ-ын Олимпийн хороотой хамтран ажиллаж байгаа бөгөөд булхиатай үйлдлийг таслан зогсоож, допинг хэрэглээгүй тамирчдад олимпийн наадамд оролцох боломжийг олгох талаар анхаарна хэмээн мэдэгджээ.

Telegraph: ОХУ-ын эсрэг 10 гол баримт

Дэлхийн хамгийн том эмэгтэйчүүдийн дотуур хувцасны брэнд Victoria's Secret жил бүр уламжлал болгон зохион байгуулдаг шоугаа Нью Йорк хотноо энэ долоо хоногт хийлээ. Загварын ертөнцийн шинэ одод Кендалл Женнер, Жижи Хадид нараар эгнээгээ тэлсэн "сахиусан тэнгэрүүд" 10 гаруй сая долларын төсөвтэй энэхүү шоуг чимсэн юм. "Фантази бра" буюу энэ үдшийн хамгийн үнэтэй онцлох өмсгөлийг Лили Алдриж олон нийтэд танилцуулсан. 2 сая доллараар үнэлэгдсэн уг өмсгөлийг 685 цагийн турш урлажээ. Алдарт Рианна энэ жилийн гол урлагийн номерийг үзүүлэх байсан ч хуваарийн шахуу байдлаас шалтгаалан гэрээгээ цуцалж, шинэ цомгоо гаргаад удаагүй байгаа Элли Гоулдинг түүнийг орлон, Селена Гомезийн хамтаар уран бүтээлээ хүргэсэн юм. Олон зуун сая үзэгчдийн хүсэн хүлээдэг энэхүү шоу 12-р сарын 8-ны өдөр телевизээр олон нийтэд албан ёсоор цацагдах ажээ.

ОК: Victoria's Secret-ийн талаар таны мэдэхгүй 10 зүйл
ET: 2015 оны шоу гэрэл зургийн дуранд

Технологийн ертөнц энэ долоо хоногт харьцангуй нам жим байлаа. Гэхдээ Facebook хэрэглэгчдийн хүсэл сонирхолд тааруулсан мэдээг санал болгодог Notify аппликэйшнээ танилцуулсныг бид онцолж байна. Твиттертэй өрсөлдөх зорилготой, дэлхийн хамгийн том 70 гаруй мэдээллийн агентлагуудын мэдээг шууд танд хүргэх уг апп энэ долоо хоногт АНУ-д хэрэглэх боломжтой болсон юм. Фэйсбүүк таймлайны хамгийн сул талуудын нэг гэгдэж байсан шууд мэдээнүүдийг цэгцтэй хүлээж авах асуудлыг notification маягаар танд ирүүлэхээр шийдсэн энэ апп маркетер, компаниудын хувьд зар сурталчилгааны нэмэлт нэг талбар болох нь гарцаагүй биз ээ. Үүнээс гадна Candy Crush-ийг худалдаж аваад удаагүй байгаа Activision Blizzard алдарт Call of Duty франчайзийнхаа шинэ хувилбар BlackOps 3-ийн орлогын үзүүлэлтийг дэлгэсэн нь мөн онцлууштай мэдээлэл байв. Худалдаанд гарсан эхний гурван хоногтоо л 550 сая долларын орлого олсноор уг тоглоом нийт энтертэйнмент салбарын (кино, ном, CD-г оролцуулан) энэ жилийн хамгийн том нээлтэд тооцогдох болов. Киногоор жишээлэхэд, хамгийн амжилттай нээлтээ хийсэн Avengers болон Jurassic Park-ийн шинэ ангиудын нийлбэр орлого 415 сая доллар байсан юм.


TR: Call of Duty 8 жижиг улсын жилийн нийт орлогоос илүүг нээлтээрээ оллоо
TechCrunch: Facebook Notify-тай танилц